మంత్రాలయం బీజేపీ ఎమ్మెల్యే డాక్టర్ పార్థసారథి, తమ పార్టీ కార్యకర్తల్లో ఉత్సాహం నింపేలా ఒక పవర్-ఫుల్ ప్రసంగం చేశారు. ఎమ్మెల్యే మాట్లాడుతూ తన టీమ్ ఎలా ఉండాలో కార్యకర్తలకు దిశానిర్దేశం చేశారు.
మీసం మెలేసేలా రాజకీయం చేయండి.. కార్యకర్తలు ఎవరికీ భయపడాల్సిన అవసరం లేదని, దేనికీ వెనకడుగు వేయకూడదని ఆయన పిలుపునిచ్చారు. పౌరుషానికి, ధైర్యానికి గుర్తుగా “మీసం మెలేసి” దర్జాగా ఉండాలని కార్యకర్తలకు చెప్పారు ఎమ్మెల్యే.
దూరం 25 కిలోమీటర్లే.. 15 నిమిషాల్లో మీ ముందు ఉంటా.
పార్టీ కోసం కష్టపడే కార్యకర్తలకు తాను ఎప్పుడూ అండగా ఉంటానని ఎమ్మెల్యే భరోసా ఇచ్చారు. కేవలం 25 కిలోమీటర్ల దూరంలోనే తాను ఉంటానని, కార్యకర్తలకు ఏదైనా సమస్య వస్తే కేవలం పదిహేను నిమిషాల్లో స్వయంగా వారి ఇంటికి చేరుకుంటానని బలమైన హామీ ఇచ్చారు. తన వాళ్ళను వేధించాలని చూస్తే అధికారులు లేదా పోలీసులైనా సరే ఊరుకునేది లేదని తీవ్రంగా హెచ్చరించారు. కార్యకర్తలకు పూర్తి రక్షణ ఉంటుందని స్పష్టం చేశారు.
మంత్రాలయంలో మనదే హవా మంత్రాలయం ప్రాంతంలో పూర్తి రాజకీయ ఆధిపత్యం సాధించడమే లక్ష్యంగా పని చేయాలని కార్యకర్తలకు ఎమ్మెల్యే పిలుపునిచ్చారు. తమకు ఎవరు అడ్డు వచ్చినా తగు రీతిలో గట్టిగా బుద్ధి చెబుతామని అన్నారు.
ఊపిరి ఉన్నంత వరకు పార్టీ కోసమే చివరగా, ప్రాణం ఉన్నంత వరకు పార్టీ జెండానే ఊపిరిగా బతకాలని, పార్టీ లక్ష్యమే తమ ధ్యేయంగా పని చేయాలని ఆయన కార్యకర్తలను కోరారు.
