ఆంధ్రప్రదేశ్ అసెంబ్లీలో ఎమ్మెల్యే డా. పార్థసారథి కల్తీ మద్యం అంశంపై తీవ్ర విమర్శలు చేశారు. జగన్మోహన్ రెడ్డి ముఖ్యమంత్రిగా ఉన్న సమయంలో మద్యం నాణ్యతపై అనేక అనుమానాలు వచ్చాయని ఆయన పేర్కొన్నారు. విషపూరిత రసాయనాలు కలిసిన మద్యం ప్రజలకు అమ్మబడిందని, పైరోగలాల్, ఐసోప్రోపిలేట్ ఆసిడ్ వంటి హానికర పదార్థాలు మద్యంలో కనుగొనబడ్డాయని తెలిపారు. ఈ కారణంగా గత ఐదేళ్లలో సుమారు 30 వేల మంది ప్రాణాలు కోల్పోయారని, మరో 36 వేల మందికి కిడ్నీ మరియు లివర్ సమస్యలు వచ్చినట్లు అంచనాలు ఉన్నాయని డా. పార్థసారథి చెప్పారు.
కూటమి ప్రభుత్వం అధికారంలోకి వచ్చిన తర్వాత మద్యం నాణ్యతను మెరుగుపరచడానికి చర్యలు తీసుకున్నామని ఎమ్మెల్యే డా. పార్థసారథి వివరించారు. రాష్ట్రంలో మూడు ఆధునిక రసాయన ప్రయోగశాలలు ఏర్పాటు చేసి, తొమ్మిది రకాల పరీక్షల తర్వాతే మద్యం షాపులకు సరఫరా చేస్తున్నామని తెలిపారు. నాణ్యత పెరగడంతో మద్యం అమ్మకాలు సుమారు 40 శాతం పెరిగాయని, ప్రస్తుతం ఆంధ్రప్రదేశ్లో తయారైన మద్యం పక్క రాష్ట్రాలకు కూడా పంపిస్తున్నామని చెప్పారు.
అలాగే గత ప్రభుత్వ హయాంలో మద్యం ధరలు భారీగా పెరిగాయని డా. పార్థసారథి విమర్శించారు. ఒక క్వార్టర్ బాటిల్ ధర 150 నుంచి 200 రూపాయల వరకు ఉండడంతో రోజుకు కూలీ పని చేసే పేదవారికి భారంగా మారిందని అన్నారు. కూటమి ప్రభుత్వం వచ్చిన తర్వాత ధరలను తగ్గించి సామాన్యుడికి అందుబాటులో మద్యం విక్రయాలను తీసుకువచ్చామని ఎమ్మెల్యే డా. పార్థసారథి తెలిపారు.
